GJILAN – Një gjyqtar i procedurës paraprake i Departamentit të Krimeve të Rënda të Gjykatës Themelore në Gjilan, sipas kërkesës së Prokurorisë Themelore në Gjilan, ka urdhëruar mbajtjen në paraburgim të pandehurin G. Jakupi, në kohëzgjatje prej 1 (një) muaji.
I pandehuri G. Jakupi, shqiptar, shtetas i Republikës së Kosovës, me profesion zyrtar policor, dyshohet se ka kryer veprën penale, sulmi nga neni 187 paragrafi 1 të Kodit Penal të Republikës së Kosovës dhe veprën penale, përdorimi i armës apo mjetit të rrezikshëm nga neni 375 paragrafi 2 të KPRK-së.
I pandehuri G. Jakupi, si person zyrtar në vendin publik para shtëpisë së shëndetit në Gjilan ka sulmuar, duke e goditur me grushte në kokë dhe fytyrë të dëmtuarin G. Q. si dhe dëshmitarin E. S., sikur edhe fakti tjetër se si person zyrtar në vend publik në praninë e qytetarëve me revole zyrtare i është kërcënuar të pranishmëve të cekur më lartë.
Ndërkohë në kohën kur ka ndodhur ky incident, i pandehuri, G. Jakupi ka qenë jashtë detyrës zyrtare.
Të pandehurit në procedurë penale gëzojnë të drejtën e kontestimit të urdhrit për paraburgim të nxjerrë nga gjyqtari i procedurës paraprake.